Notendaskilmálar

Síðast uppfært: 10. nóvember, 2026

Öll notkun hugbúnaðarlausnarinnar Vergo (hér eftir „kerfið“) er háð þeim skilmálum sem fram koma hér að neðan. Hafi viðskiptavinur gert þjónustusamning við félagið gengur sá samningur framar skilmálum þessum.

1. ALMENNT

Með því að skrá þig inn sem notanda í kerfið samþykkir þú skilmála þessa. Kerfið er eign Vergo ehf., kt. 490318-0110 (hér eftir „félagið“). Félagið fer eitt með stjórn kerfisins.

Aðgangur að kerfinu er einungis heimill þeim sem fengið hafa úthlutaðan aðgang (hér eftir „notandi“). Aðgangur er persónubundinn en í því felst meðal annars að hann er ekki framseljanlegur.

Tilgangur kerfisins er utanumhald og stýring mála, verka, krafna, skjala, tíma og kostnaðar í starfsemi viðskiptavina félagsins, svo sem lögmannsstofa, sérfræðifyrirtækja og vátryggingafélaga.

Notandi ber fulla ábyrgð á því að óviðkomandi aðilar komist ekki að aðgangsupplýsingum hans, þ.m.t. lykilorði og auðkenningarkóðum. Leiki grunur á að óviðkomandi aðili hafi komist að þeim ber notanda umsvifalaust að breyta lykilorði sínu og láta stjórnanda síns fyrirtækis vita.

Komi til misnotkunar á notkun kerfisins, eða brotum gegn skilmálum þessum, áskilur félagið sér rétt til þess að loka fyrir aðgang viðkomandi án tafar. Þá áskilur félagið sér jafnframt rétt til að grípa til hvers kyns annarra úrræða sem lög, reglur og skilmálar þessir heimila.

Óheimilt er að nota kerfið í óheiðarlegum eða ólöglegum tilgangi, að reyna að komast fram hjá aðgangsstýringu eða öryggisráðstöfunum kerfisins, eða að sækja gögn úr því með sjálfvirkum hætti öðruvísi en í gegnum þær tengingar sem félagið býður.

2. TENGINGAR OG GERVIGREIND

Hafi stjórnandi fyrirtækis notanda heimilað það getur notandi tengt gervigreindarforrit, svo sem Claude, ChatGPT eða Microsoft Copilot, við kerfið. Gervigreindin starfar þá í nafni notandans og með hans heimildum, og allt sem hún skráir eða breytir í kerfinu telst gert af notandanum.

Notandi ber ábyrgð á að fara yfir aðgerðir gervigreindarinnar áður en hann samþykkir þær. Félagið ber ekki ábyrgð á efni sem gervigreind býr til, á villum hennar eða á vinnslu þess sem rekur gervigreindarforritið. Sama gildir um aðra þjónustu þriðja aðila sem tengd er við kerfið, svo sem Microsoft 365.

3. EIGN HUGVERKARÉTTINDA

Vörumerki og hvers kyns auðkenni sem sjást í kerfinu eru eign félagsins. Allt innihald kerfisins, þar með talin útlitshönnun (texti, grafík, myndir o.fl.), hugbúnaður og notkunarmöguleikar njóta höfundaréttar. Öll hugverkaréttindi eru eign félagsins.

Félagið veitir notendum leyfi til að skoða og nota kerfið samkvæmt þessum skilmálum. Notendum er óheimilt að nota vörumerki félagsins án skriflegrar heimildar félagsins. Þá er notendum óheimilt að nota eða nýta innihald kerfisins í nokkrum öðrum tilgangi en heimilað er samkvæmt þessum skilmálum eða samkvæmt skriflegu leyfi félagsins.

Gögn sem notendur vista í kerfinu eru eign viðkomandi viðskiptavinar félagsins.

4. TAKMÖRKUN ÁBYRGÐAR

Félagið leitast við að halda kerfinu aðgengilegu og öruggu en ábyrgist ekki að það verði ávallt án truflana eða villna. Félagið ber ekki ábyrgð á óbeinu eða afleiddu tjóni sem rekja má til notkunar kerfisins. Að öðru leyti fer um ábyrgð félagsins gagnvart viðskiptavinum eftir þjónustusamningi.

Félagið er ekki ábyrgt fyrir tjóni, sem stafar af óviðráðanlegum orsökum (force majeure), s.s. vegna lagaboða, aðgerða stjórnvalda, náttúruhamfara, stríðs, verkfalls, verkbanns, skæruverkfalla eða annarra slíkra aðstæðna, tæknilegrar bilunar í tækjabúnaði, rafmagnstruflana eða rafmagnsleysis, né vegna truflana í símkerfi eða öðrum boðleiðum eða samgöngum.

Takmarkanir þessar gilda ekki ef tjón verður rakið til ásetnings eða stórfellds gáleysis félagsins.

5. SÖFNUN OG VINNSLA PERSÓNUUPPLÝSINGA

Félagið vinnur með persónuupplýsingar í kerfinu sem vinnsluaðili fyrir viðskiptavini sína, sem eru ábyrgðaraðilar, samkvæmt vinnslusamningi og íslenskum lögum um persónuvernd og vinnslu persónuupplýsinga, nr. 90/2018. Félagið skráir innskráningar og aðgerðir notenda í atvikaskrár til að tryggja öryggi kerfisins og svo að stjórnendur viðskiptavinar geti haft yfirsýn yfir notkun þess. Nánar er fjallað um meðferð persónuupplýsinga í öryggis- og persónuverndarstefnu Vergo.

6. BREYTING Á SKILMÁLUM

Félagið áskilur sér rétt til að endurskoða og breyta skilmálum þessum og er notendum þá tilkynnt um slíkar breytingar með minnst 15 daga fyrirvara, í kerfinu eða með tölvupósti til stjórnenda viðskiptavina. Áframhaldandi notkun kerfisins eftir gildistöku breytinga telst samþykki á þeim.

7. LÖG OG REGLUR

Íslensk lög gilda um kerfið. Mál sem rísa vegna notkunar kerfisins skal reka fyrir Héraðsdómi Reykjavíkur.

Hvers kyns undantekningar og takmarkanir frá skilmálum þessum eiga aðeins við að því marki sem íslensk lög heimila.